ថ្មីៗនេះ មណ្ឌលត្រួតពិនិត្យលក្ខណៈ បច្ចេកទេសយានយន្ត (ឆៀក) ថ្មីមួយកន្លែងទៀត ស្ថិតនៅតាមបណ្តោយមហាវិថីហាណូយ បានបើកដំណើរការសាកល្បងចាប់ពីថ្ងៃនេះតទៅហើយ ធ្វើឲ្យមានមណ្ឌលចំនួន ៩ទីតាំងនៅភ្នំពេញ ។ 

តាមការឲ្យដឹងពីក្រសួងសាធារណការ និងដឹកជញ្ចូន ថា ដើម្បីឆ្លើយតបទៅនឹងកំណើនយានយន្តក្នុងប្រទេសកម្ពុជា និងពង្រីកការផ្តល់សេវាសាធារណៈ ឱ្យកាន់តែទូលំទូលាយក្រុមហ៊ុនខេមបូឌា ម៉ូទ័រវីហ៊ីឃល អ៊ិនស្ពេកសិន (Cambodia Motor Vehicle Inspection) បានសម្រេចបើកឱ្យដំណើរការសាកល្បង មណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) ថ្មីនេះ ដោយទទួលបាន អាជ្ញាបណ្ណអនុញ្ញាតឱ្យធ្វើអាជីវកម្មពី ក្រសួងសាធារណការ និងដឹកជញ្ជូន ដែលធានាបានថាការត្រួតពិនិត្យលក្ខណៈបច្ចេកទេសយានយន្តនៅទីនេះ គឺប្រកបដោយភាពត្រឹមត្រូវគ្រប់លក្ខខណ្ឌ តាមបទដ្ឋានបច្ចេកទេស។

មណ្ឌលត្រួតពិនិត្យលក្ខណ:បច្ចេកទេសយានយន្ដ ហាណូយសំរោងអណ្ដែត នេះ មានទីតាំងស្ថិតនៅតាមបណ្តោយមហាវិថីហាណូយ ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលពេលនេះ កំពុងតែចាប់បើកដំណើរការសាកល្បង ជារៀងរាល់​ថ្ងៃចន្ទ ដល់ថ្ងៃសៅរ៍ ចាប់ពីម៉ោង ៧:០០ ព្រឹក រហូតដល់ម៉ោង ១៧:០០ ឬ ៥ៈ០០ នាទីល្ងាច។

គួរបញ្ជាក់ផងដែរថា មកទល់ពេលនេះ មជ្ឈមណ្ឌលឆៀកយានយន្ដ នៅរាជធានីភ្នំពេញមានរាប់ទាំង មណ្ឌលថ្មី ហាណូយសំរោងអណ្ដែតនេះ មានចំនួន ៩ ទីតាំង ដូចជា៖ 

• ឬស្សីកែវ ផ្លូវលេខ៥៩៨(ឯកឧត្តម ជា សុផារ៉ា)
• ជ្រោយចង្វារ ផ្លូវជាតិលេខ៦(ចន្លោះស្ពានទី៣ និងស្ពានទី៤)
• ចំការដូង ផ្លូវលេខ២១៧(ជិតសាលាខណ្ឌដង្កោ) 
• បឹងស្នោរ ផ្លូវជាតិលេខ១(ជាប់ចំណតយានយន្តលោកជំទាវ ស៊យ សុផាន)
• កំបូល ផ្លូវជាតិលេខ៤(ទល់មុខជិតតំបន់សេដ្ឋកិច្ចពិសេសភ្នំពេញ)
• បឹងបៃតង ផ្លូវលេខ១៩២៨(ក្បែរផ្សារបឹងបៃតង)
• អូដឹម ផ្លូវជាតិលេខ៤(អូដឹម)
• សែនសុខ ផ្លូវលេខ ១៩៨៦ (ផ្សារដីហុយ ភូមិភ្នំពេញថ្មី សង្កាត់ភ្នំពេញថ្មី)
• ហាណូយសំរោងអណ្ដែត​ (មហាវិថីហាណូយ ភូមិពោងពាយ សង្កាត់ភ្នំពេញថ្មី) 

ប្រភព៖ ក្រសួងសាធារណការ​ និងដឹកជញ្ចូន 

អត្ថបទ៖ Andra